Mangganang Angah di Kampung Halaman

Mangganang Angah di Kampung Halaman

Saharianan pian bagawi bacari gasan pamakan

Kada tahu ari panas manggantang tatap haja bagawian

Mulai manaradak hampai bairik gawi surangan

Kada mau pian handak maupahakan

Pian liwar saing kada kawa dikalahakan

Pian kada suah marasa kauyuhan bausaha surangan

Pian tarus basabar kayapa haja cubaan

Tapi kawajiban kada suah jua pian tinggalakan

Tapi biar pian binian lawan bausaha saraba saurangan

Ada haja labihan kada sakadar gasan pamakan

Kawa haja sambil manyakulahan ulun hampai kuliah

Kawa haja jua tulak ka makah lawan jiarah ka wadah Rasulullah

Biar pian lain kuwitan tapi ulun sudah maanggap pian kuwitan

Mun ulun mulai halus diharagu bagana sarumah sapamakanan

Pian nang mandidik ulun lawan tarus mandu’akan

Hampai wahini ulun ganal pian tarus mamikirakan

Wahini umur pian sudah tujuh puluh lima an

Kada bagawi lagi karana sudah ada haja tabungan

Pian samakin rajin haja tulak ka urang babacaan

Samakin rajin jua baibadah lawan baamalan

Ulun dandaman lawas kada mandangar papadah pian

Ulun kasian pian surangan di rumah tambah lagi pian gagaringan

Saharusnya ulun kada maninggalakan pian kuliah ka jajauhan

Ngini waktunya ulun nang maharagu pian

Gambar pian haja nang kawa ulun lihat di banua urang

Banyu mata nang kaya hujan labat  amun mangganang

Ulun handak banar mambahagiaakan pian lawan kaluarga sabarataan

Kabahagiaan ulun adalah kabahagiaan kita sakaluargaan