DUNIA SAMAKIN TUHA

DUNIA SAMAKIN TUHA

Musibah mulai bahamburan di mana-mana

Gunung sudah malatusan kadada takira

Baah nang tarus mamakan umat manusia

Tanah rumbihan nang mahancurakan rumah warga

Ulun mangira ngitu tandanya Tuhan murka

Dasar manusianya kada lagi batata

Mata hatinya sudah buta

Kada maingat lagi lawan hukum agama

Aurat bibinian sudah manjadi hiasan dunia

Lalaki bahanu kada kawa manahani nafsunya

Jujuran samakin larang sakahandak urang tuha

Samunyaan ngitu maakibatakan tarjadinya zina

Pamimpin bahanu kada baguna

Hak rakyat dimakan sakahandaknya

Rakyat miskin dilihat sabalah mata

Kaadilan kada lagi marata

Kayapa Tuhan kada murka

Mun nang maulah dusa banyak kada sakira

Nang baibadah kada sabanding lawan nang baulah dusa

Samakin dunia batuha samakin sadikit jua

Ayu kawan kita batubat lawan sang pancipta

Muhun ampunan sagan kita samua

Mudahan satiap langkah kita diridhai-Nya

Mati mambawa iman lawan masuk surga